ЖУУЛЧДАД ЗОРИУЛСАН “ЯЗГУУР СОЁЛЫН НААДАМ” ТӨСӨЛ ХЭРЭГЖИНЭ

Монголын уламжлалт соёл, язгуур урлагийг гадаад, дотоодын жуулчдад цогцоор нь танилцуулах зорилготой “ЯЗГУУР СОЁЛЫН НААДАМ” төслийг 2026 оны 06 дугаар сарын 10-ны өдрөөс эхлэн зуны улирлын турш тогтмол зохион байгуулахаар болжээ.

Тус төсөл нь Монголын үндэсний өв соёлыг нэг дор төвлөрсөн, өртөөчилсөн хэлбэрээр үзэгч, жуулчдад хүргэх онцлогтой бөгөөд уламжлалт урлаг, ахуй соёлын олон талт үзүүлбэр, туршлага дээр суурилсан соёлын аялал жуулчлалыг хөгжүүлэх зорилготой юм.

Төслийн хүрээнд Монголын уламжлалт хөгжимт бясалгал, тойрон бүжиг, бий биелгээ, язгуур хөгжмийн тоглолт, морин хуурын үзүүлбэр, уртын дуу, өвлөн уламжлагчдын тоглолтууд багтсан байна. Мөн язгуур өвийн музейн танилцуулга, 13-р зууны үеийн ахуй соёлын дүрслэл, үндэсний хувцасны өвийг харуулсан үзүүлбэрүүдийг нэг дор цогцоор нь толилуулах аж.

Энэхүү наадам нь Монголын түүх, соёл, уламжлалт амьдралын хэв маягийг жуулчдад ойлгомжтой, хүртээмжтэй байдлаар танилцуулах, соёлын өвийг олон улсад сурталчлан таниулах чухал ач холбогдолтой гэж зохион байгуулагчид онцолж байна.

“ЯЗГУУР СОЁЛЫН НААДАМ” нь 2026 оны зуны улиралд тогтмол зохион байгуулагдах бөгөөд Монголын соёлын аялал жуулчлалыг хөгжүүлэх, үндэсний өвийг хадгалан хамгаалах, олон улсын жуулчдын сонирхлыг татах чухал төсөл болох төлөвтэй байна.