“УЛААНБААТАР ИХ ДУУЛГА–2026” ЖҮДО БӨХИЙН ТЭМЦЭЭН ЭХЭЛЛЭЭ

Олон улсын жүдо бөхийн холбооны (IJF) Дэлхийн жүдо бөхийн аялалын нэг хэсэг болох “Улаанбаатар Их Дуулга–2026” тэмцээн 2026 оны 6 дугаар сарын 19-нд Монгол Улсын нийслэл Улаанбаатар хотод албан ёсоор эхэлж, 6 дугаар сарын 21-нийг хүртэл үргэлжлэхээр зохион байгуулагдаж байна.

Тэмцээнд нийт 58 орны 450 гаруй жүдоч оролцож байгаа бөгөөд эрэгтэй, эмэгтэй нийт 14 жингийн ангилалд дэлхийн шилдгүүд хүч үзэж байгаа нь энэ удаагийн тэмцээний өрсөлдөөнийг өндөр түвшинд хүргэж байна.

Тэмцээний эхний өдөр буюу өнөөдөр эмэгтэйчүүдийн 48 кг, 52 кг, 57 кг болон эрэгтэйчүүдийн 60 кг, 66 кг-ын жингийн барилдаанууд явагдаж байгаа бөгөөд урьдчилсан шатны барилдаанууд өглөө 09:30 цагаас эхэлж, медалийн төлөөх шийдвэрлэх барилдаанууд оройн 17:00 цагаас явагдах хуваарьтай байна.

Олон улсын жүдо бөхийн холбооны цуврал “Их Дуулга” ангиллын тэмцээн нь Олимпын эрхийн оноо олгодгоороо өндөр ач холбогдолтой бөгөөд тамирчдын дэлхийн чансаанд шууд нөлөөлдөг тул улс орнуудын шилдэг жүдочид бүрэн бүрэлдэхүүнээрээ оролцож байна.

“Улаанбаатар Их Дуулга–2026” нь Монгол Улсад жил бүр уламжлал болгон зохион байгуулагддаг олон улсын томоохон спортын арга хэмжээний нэг бөгөөд тус тэмцээн нь Монголын жүдо бөхийн хөгжил, олон улсын спортын хамтын ажиллагаа болон аялал жуулчлалд чухал хувь нэмэр оруулдаг гэж зохион байгуулагчид онцолж байна.

Тэмцээн 6 дугаар сарын 21-нийг хүртэл үргэлжилж, жингийн ангилал бүрийн аваргууд тодрох юм.